اوباشدان و اوباشدانلیق

سایین حیدر بایات‌ین اوباشدان و اوباشدانلیق سؤزو حاققینداکی یازیسی(دیل حاقدا قیسا یازیلار ۱۰ / سید حیدر بیات-اوباشدانلیق سؤزجویو حاقدا) و قیویر-زیویر‌ین بونا بنزر تؤره‌دیلمیش چئشتدانلیق سؤزونون سولدوزدا ایشلندیگینی یازماسی(«اوباش» سؤزو حاققیندا) منی ده ماراقلاندیردی آمما نه یازیق کی «ديل دنيز»ین نه/کیم اولدوغو حاقدا بیلگی وئرمه‌میشلر.

منجه ده بو سؤز او+باش+دان+لیق‌ین ترکیبی اولمالی و بوراداکی -دان اک/شکیلچی‌دیر، آد دئییلدیر. سایین بایات‌ین دئدیگی ده چوخ ماراقلیدیر آمما منجه مسأله‌نی چوخ دا چتینلشدیرمه‌مه‌ک گرکلی. هر حالدا من سایین بایات بیگین باخیشینا “ائتیمولوژیده تنقیدی باخیش” آدی وئریب آلقیشلاییرام. بئله بیر باخیش آچیسی صاحیبی اولماق چوخلو ائتیمولوژی سورونلاریمیزی چؤزمه‌گه یاردیم ائده بیلر.

آیریجا سؤزلریمیزین چئشیدلی آغیزلاردا نئجه ایشلندیگی ده بیزه اؤنملی ایپ اوجلاری وئره بیلر. اؤرنک اولاراق اوباشدان سؤزونون آنادولو آغیزلاریندا نئجه ایشلندیگینی ده آراشدیرماق لازیم.

آنادولو آغیزلاریندا، اؤزه‌للیکله تورکییه آزربایجانیندان(تورکییه‌نین آزربایجان ساحه‌سیندن Azeri Sahası) ساییلان دوغو(وان-ارجیش) و قوزئی دوغو آنادولو(آرتوین) و یؤروک تورکمان عشیرتلرینین اسکی یوردلاریندان اولان آدانادا دا بو سؤز ایشلنیرمیش.

[obaşdan]
Şafak sökmeden, erkenden, sahur vakti. [ Derleme Sözlüğü c: 9 ]
*Erciş -Van

obaştan
Şafak sökmeden, erkenden, sahur vakti. [ Derleme Sözlüğü c: 9 ]
Yavuz, Salcı, Çavdarlı, Kocabey *Şavşat, Erkinis *Yusufeli, Bağlıca *Ardanuç -Artvin
Gerdan -Adana

Türkiye de Halk Ağzından Derleme Sözlüğü; Ankara : Türk Dil Kurumu , 1977. cilt: 9; L-R ( la - rüzgârlık )

یازیدان سونرا: دیل دنیز اسماعیل هادی نین ائتیمولوژیک سؤزلوگو ایمیش؛ بونو قیویر زیویر لوطف ائدیب یورومدا یازمیشلار.

دیل دنیز ایسماعیل هادی‌نین یازدیغی تورکجه-فارسجا ائتیمولوژیک سؤزلوک‌دور.
بو کیتابا راجع بیر یازی یازماق ایسته‌ییرم چوخ‌دان، آمما ندنسه اولماییب هله.