قوندوم-کؤچدوم!

سایین حیدر بیات بو چوق ایلگینچ یازیسیندا کؤچ-قون ایصطیلاحینی تانیدیب، بو ایصطیلاحین قوم-ساوه شاهسونلری آراسیندا یایغین اولدوغونو و باشقا یؤره‌لرده ایشلنمه‌دیگینی یازمیشدی. من ده باغلی اولدوغوم ماراغا-قوشاچای-سایین‌قالا یؤره‌سینده ائشیتمه‌میشدیم بو ایصطیلاحی. هر حالدا چوخ گؤزل ایصطیلاحدیر و تورکجه‌نین نه قدر زنگین اولدوغونو و نه قدر یئنی ایصطیلاحلار یاراتماق اوچون قابیلییتلی دیل اولدوغونو گؤستریر.

بو ایصطیلاح منه آذربایجان خالق اویونلاریندان اولان قوندوم-کؤچدوم اویونونو خاطیرلاتدی. بیزیم یؤره‌ده قوندوم-کؤچدوم آدلی بیر اویون وار و یئرده خطلر جیزیلاراق جدول چکیلیر و خیرداجا داشلارلا قوندوم-کؤچدوم آدلی اویون اوینانیر. بو اویونون چوخ اسکی اولدوغو و حتتا ایلکل(اولیه) اینسانلار چاغیندا ، اینسانلارین ماغارالاردا یاشادیغی دؤورلرده بئله اویناندیغینی ائشیتمیشم. بونون فارسجا آدینی تاپا بیلمه‌میشم. بلکه ده بیر چوخ فارسجاسی اولمایان سؤزلریمیز کیمی بونون دا فارسجاسی یوخ ایمیش و یا فارسلار قوندوم-کؤچدوم اویناماز ایمیشلر! یولداشلار بیلیرلرسه لوطفا یازسینلار.

گله‌ک کؤچ-قون‌ون نییه قون-کؤچ ایله دگیشدیریلدیگینه! منجه بو سس اویومو(آهنگ قانونو) ایله ایلگیلی اولمالی. دوزونو ایسه‌سز منیم ده قولاغیما آغیر گلیر بیر آز!
اوندان داها ایلگینجی! بو قوندوم-کؤچدوم اویونونا ماراغادا قوندوم-قوچدوم دئینلر آز دئییل. یانی خالق اینجه و قالین سسلری بیر-بیری ایله اویومسوز بولدوغوندان اویدورموش!